Skapandi hugmyndasamkeppni – Margnota Snæfellsnes

Næstu vikurnar mun verkefnið Margnota Snæfellsnes standa yfir og biðjum við þig kæri íbúi að taka virkan þátt, í vinnunni, á heimilinu eða á ferðinni. Sem framleiðendur og neytendur er það undir okkur komið að líta í kringum okkur, sjá hvað má fara betur og hvernig við getum unnið í sameiningu. Verum hagnýtari og fyrirmyndir fyrir hvort annað og komandi kynslóðir. Margnota lífstíll borgar sig margfalt fyrir samfélag, efnahag og umhverfi — þetta tvinnast allt saman!

Íbúar á öllum aldri eru hvattir til þess að taka þátt í þessari skapandi hugmyndasamkeppni í tengslum við verkefnið. Frekari upplýsingar má sjá í auglýsingunni hér að neðan:

Skref í rétta átt!

Þessa dagana er ritið Skref í rétta átt á leiðinni á öll heimili á Snæfellsnesi en í því er fjallað um umhverfisvottun sveitarfélaganna á Snæfellsnesi og hverju hún hefur skilað. Fyrir útgáfu ritsins standa Framkvæmdaráð Snæfellsness og Náttúrustofa Vesturlands en útgáfan var styrkt af Umhverfis- og auðlindaráðuneytinu. Í ritinu er meira en áratugar saga umhverfisvottunarverkefnis Snæfellsness rakin og verkefnið útskýrt. Um leið er reynt að reynt að svara þeim spurningum sem forsvarsmenn verkefnisins hafa fengið í gegnum tíðina.

Með ritinu fylgir margnota innkaupapoki merktur umhverfisvottunarverkefni Snæfellsness og er hann gjöf frá sveitarfélögunum á Snæfellsnesi. Á honum er að finna slagorðin hugsum áður en við kaupum og hugsum áður en við hendum. Íbúar eru hvattir til þess að tileinka sér þessi einkunnarorð um leið og skorað er á alla að hætta að nota plastburðarpoka og leggja með því grunn að plastpokalausu Snæfellsnesi.

Ritinu og pokanum var ekki dreift á heimili þar sem fjölpóstur hefur verið afþakkaður. Því fólki er velkomið að láta vita hjá sínu sveitarfélagi.   

Endurnýjuð framkvæmdaáætlun sveitarfélaganna 2016-2020

Framkvæmdaáætlun er eitt af grundvallarskjölum umhverfisvottunarverkefnis Snæfellsness. Vottunarsamtökin gera kröfur til þess að sveitarfélögin setji sér fram
kvæmdaáætlun til fimm ára í senn, sem svo er endurskoðuð árlega.

Eins og nafnið bendir til er það lýsing á helstu umhverfistengdu verkefnum sveitarfélaganna komandi ár. Við gerð hennar þarf að finna jafnvægi á milli metnaðar og væntinga um framfarir annars vegar og raunsæi með tilliti til fjárveitinga hins vegar.

Í febrúar síðastliðnum samþykkti Framkvæmdaráð Snæfellsness endurskoðaða framkvæmdaáætlun fyrir sveitarfélögin fimm og hana má nálgast hér.

 

 

Snæfellsnes einn af hundrað grænustu áfangastöðum heims

Snæfellsnes er einn af 100 grænustu áfangastöðum heims samkvæmt nýbirtum lista sem opinberaður var í gær, 10. desember.

Um er að ræða verkefni sem kallað er „Global Top 100“. Þar er tekið saman yfirlit yfir þá hundrað staði í heiminum sem þykja skara fram úr á sviði umhverfismála.  Verkefnið er samstarfsverkefni nokkurra aðila sem hafa sérhæft sig í rannsóknum og markaðssetningu grænna áfangastaða og nefnast samtökin „Green Destinations“. Tilgangurinn er að veita áfangastöðum, sem hafa sjálfbærni að leiðarljósi, viðurkenningu og auðvelda um leið kröfuhörðum ferðamönnum val um áfangastaði.

Listinn var fenginn þannig að kallað var eftir tilnefningum í gegnum samfélagsmiðla. Svo tók við þrjátíu manna dómnefnd skipuð sérfræðingum í ferðamálum og sjálfbærni, sem gaf einkunnir fyrir fjölmarga þætti, þar á meðal náttúru, umhverfi, náttúruvernd, menningararf og umhverfisvottun.

Áfangastöðunum 100 er ekki raðað í neina sérstaka röð en á heimasíðu verkefnisins má raða áfangastöðunum niður á mismunandi vegu eftir einkunnum fyrir hvern þátt.

Þetta er mikil viðurkenning fyrir Snæfellsnes og staðfesting á því að sú vinna sem hér er unnin er metin að verðleikum, sem mun vonandi skila sér samfélagsins. Umhverfismál skipta sífellt stærra máli í ferðaþjónustu og ferðamenn gera sífellt strangari kröfur til áfangastaða.

Talsmenn „Global Top 100“ hvetja ferðamenn til að velja áfangastaði sem vinna að raunverulegum úrbótum í umhverfis- og samfélagsmálum. En viðurkennd vottun óháðs aðila, eins og umhverfisvottun Snæfellsness er, veitir einmitt aukinn trúverðugleika hvað það varðar.

Frekari upplýsingar er að finna á www.greendestinations.info.